Einki fiskiveiðusamstarv við Grønland í 2023

Týsdagin í hesi vikuni sendi grønlandska landsstýrið boð til Russland, at Grønland ikki fer at gera nýtslu av fiskiveiðuavtalini við Russland í 2023, og at russisk fiskifør heldur ikki sleppa at fiska sínar vanligu kvotur í Grønlandi.

Tað skrivar Weekendavisen.

Tað er fyrstu ferð síðani 1992, tá ið Grønland gjørdi eina avtalu við Russland um fiskiveiðuavtalu, at Grønland á hendan hátt ikki vil nýta møguleikan at býta um kvotur við Russland.

Grønlendsk fiskifør hava vanliga fiskað tosk í Barentshavinum. Í býti hava russisk fiskifør havt loyvi at fiska svartkalva við Grønland.

Russland bjóðaði Grønlandi til talgildar samráðingar fyri 2023. Væntað var, at Grønland hevði kunnað fingið loyvi at fiska umleið 3.000 tons av toski og hýsu í Barentshavinum.

Í býti hevði Russland fingið loyvi at fiska svartkalva og kongafisk í Grønlandi.

Men Grønland hevur avvíst hesum.