Datt á sjógv, tá hann var á veg umborð á skip

So hendi tað aftur.

Ein maður datt á sjógv, tá hann var á veg um borð á eitt fiskiskip í Klaksvík.

Hann var heppin, tí stutt aftaná komu nakrir menn, sum eisini skuldu umborð. Teir hoyrdu neyðarrópini úr sjónum, og maðurin var fingin upp á turt.

Hann var ikki førur fyri at sleppa úr sjónum sjálvur.

Politiið fekk boðini klokkan 20 minuttir í tvey í nátt.

Vegleiðing um leytarar og landgongdir

Fyri tveimum vikum síni gjørdi Sjóvinnustýrið vart við landgongdir hjá skipum og bátum eftir eina deyðsvanlukku 27.november.

Sjóvinnustýrið heitti á skiparar, sjófólk, reiðarar, skipasmiðjur, klassa, havnarskrivstovur og onnur, sum  hava við skip at gera, um at gera vart við umstøður, sum ikki tykjast tryggar hjá manning og viðskiftafólki at ganga til og frá skipum.

Á heimasíðuni hjá Sjóvinnustýrinum, fma.fo, er ein stutt vegleiðing um, hvussu leytarar og landgongdir eiga at vera.