Komandi felagið hjá Janu Mittún bjargað

Jana Mittún hevur eitt felag at skifta til í summar.

Viborg HK boðar frá, at felagið hevur megnað at útvega tær fimm milliónirnar, sum skuldu til fyri at sleppa undan húsagangi, skrivar Viborg Stifts Folkeblad.

 - Síðstu vikurnar hava verið rokutar, men Viborg hevur stuðlað okkum, og nú kunnu vit spæla kappingarárið liðugt, sigur nevndarformaðurin, Karsten Cronwald við Viborg Stifts Folkeblad.

Síðst í november frættist, at felagið hevði stórar fíggjarligar trupulleikar. Viborg HK hevði tá fingið tilsøgn um milliónastuðul, men manglaði 1,6 milliónir krónur, sum skuldu útvegast fyri nýggjár. Hetta eydnaðist, sigur felagið nú.

Tað var í oktober, at skiftið hjá Janu Mittún úr H71 til danska stórfelagið gjørdist alment.

 - Tað er dreymurin hjá mær at sleppa at royna at fara “all-in” sum hondbóltsspælari, segði hon tá við heimasíðuna hjá H71, og eftir nakrar vikur í eini ávísari óvissu, sær út til, at skiftið verður veruleiki.

Evnaríki H71-bakkurin hevur skrivað undir trý ára sáttmála, og í fyrstu syftu skal hon spæla hondbólt fulla tíð.