Neyvari upplýsingar um veður í Arktis

Miðalstór og smærri skip, sum sigla við Grønland ella aðrastaðni í Arktis, fara í framtíðini at fáa betri upplýsingar um veðurviðurskifti.

Í løtuni er torført hjá teimum skipum, sum ikki hava stórar og dýrar tøkniligar fylgjusveinaskipanir, at fáa dagførdar upplýsingar um veður og ís, tá tey sigla við Arktis.

Orsøkin er, at flestu fylgisveinar, sum ferðast kring jørðina, ferðast við ekvator, og tí røkka boðini ikki so væl Arktis.

Men sambært Sermitsiaq, skal ein nýggjur danskur fylgisveinur, sum var skotin upp við Space X-rakettini týsdagin, í eina ringrás, sum fer at hava við sær, at tað verður munandi lættari at senda boð við Grønland og har á leið. 

Royndir saman við RAL

Danski veðurstovnurin, DMI, hevur gjørt avtalu við felagið Sternula í Aalborg, sum eigur fylgisveinin, um at veðurvánir og veðurupplýsingar skulu kunna sendast út yvir Arktis við nýggja fylgisveininum.

Jacob L. Høyer frá DMI sigur, at danski veðurstovnurin longu hevur fingið samband við nýggja fylgisveinin, og næstu seks mánaðirnar verður ein veðurskipan roynd saman við Royal Arctic Line.

- Ein slík skipan, har upplýsingar um veður- og ísviðurskifti eru meira álítandi, fer at gera, at trygdin í økinum verður nógv størri, sigur Jacob L. Høyer við Sermitsiaq.