Prísvøksturin: Vit keypa minni

Føroyingar keypa minni, nú prisirnir eru farnir so nógv upp.

Hagstovan sigur, at frá triðja ársfjórðingi í 2021 til triðja ársfjórðing í fjør minkaði selda vøran í vørubólkinum matur og alkoholfríar drykkjuvørur níggju prosent.

Fyri ávikavist bólkarnar húsbúnað og húsarhaldsútgerð og klædnavørur og fótbúnað minkaði sølan 13 og 15 prosent.

Størsti prísvøkstur í 40 ár

Hagstovan hevur fyrr sagt, at frá triðja ársfjórðingi 2021 til triðja ársfjórðing í fjør vaks brúkaraprístalið 8,8 prosent. 

Hetta er størsti árligi prísvøkstur í 40 ár. 

Prísir á mati og alkoholfríum drykkjuvørum eru hækkaðir 10 prosent.

Klæði og skógvar eru vorðin seks prosent dýrari, og møblar og húsarhaldsútgerð gjørdust 11 prosent dýrari frá triðja ársfjórðingi í 2021 til triðja ársfjórðingi í fjør.