Kunnu taka palestinsk fløgg niður

Nýggi trygdarmálaráðharrin í Ísrael, Itamar Ben Gvir, hevur boðað frá, at nú verður loyvt at taka palestinsk fløgg niður á almennum plássum.

Nýggja høgravenda stjórnin hjá Netanyahu tók við 29. desember og væntað var, at hon fór at seta í verk tiltøk ímóti Palestina.

Útsagnirnar hjá trygdarmálaráðharranum eru fyrsta tekin um, at nýggja stjórnin fer halda orð, tá hon fyri valið segði, at broytingar fóru at henda í sambandi við støðuna millum Ísreal og Palestina.

Itamar Ben Gvir sigur, at orsøkin til, at tað nú skal vera loyvt at taka palestinsk fløgg niður á almennum plássum, er fyri at byrgja fyri ófriði, skrivar NTB.