Minkandi fólkatal í Japan hóttir tjóðina

Minkandi burðaravlopið í Japan er ein hóttan ímóti sjálvum tilverugrundarlagnum undir tjóðini.

Tað sigur japanski forsætisráðharrin, Fumio Kishida, nú nýggjastu tølini fyri fødd og deyð eru almannakunngjørd í Japan.

Í fjør vóru bert 800.000 børn fødd í Japan, har 125 milliónir fólk búgva.

BBC skrivar, at Japan nú er tað landið í heiminum, har næstflestir borgarar eru yvir 65 ár, ella 28 prosent. Bert í Monako eru fleiri fólk, sum er eldri enn 65.

Í sjeytiárunum blivu umleið tvær milliónir børn fødd árliga í Japan.

Ein framrokning frá 2020 vísti, at tað fara at búgva 53 milliónir fólk í Japan við endanum av hesi øldini, altso bert 40 prosent í mun til tær 125 milliónir, sum eru har í løtuni.