Runavíkar kommuna flytur

Runavíkar kommuna hevur keypt bankabygningin hjá BankNordik í Saltangará.

Prísurin er 19 milliónir krónur.

Umsitingin hjá kommununi skal nú húsast í bygninginum á Heiðavegi 54.

Semja er eisini gjørd millum partarnar um, at bankin, umvegis eitt leigumál við kommununa, flytur bankadeildina í býnum inn í hølini á Heiðavegi 13, har ið VisitRunavík hevur hildið til í nøkur ár.

Tað skrivar Runavíkar kommuna á heimasíðuni.

Kommunan ætlar at selja verandi kommunuskrivstovu á Heiðavegi 26.

Flytur í apríl/mai

Í løtuni fæst Spf. Byggiverk við at umvæla hølini millum Bókabúðina og komandi bankadeildina til VisitRunavík at húsast í, og meðan virkar Kunningarstovan í leigaðum hølum hjá Arbeiðarafelagnum Hæddini í somu gøtu. 

Væntandi flytur VisitRunavík inn í nýggj høli um miðjan mars. 

Holm Bygging fer nú undir at umvæla og seta í stand hølini, sum BankNordik í leigumáli skal virka í tey næstu árini, og væntandi kann bankin flyta av Høgabóli inn í nýggja deild á Heiðavegi 13 einaferð í apríl/mai. 

Tástani kann farast undir at flyta fyrisitingina hjá kommununi inn á Høgaból, har Bank Nordik húsast í dag, og væntandi kann tað, um alt gongur eftir ætlan, gerast fyri summarfrítíðina í ár. 

Verandi kommunuskrivstova verður lýst til sølu í almennum útboði.

Runavíkar kommuna, Runavík

Býráðssalurin í Gamla skúla á Glyvrum

Ætlanin er eisini, at gamli skúlin á Glyvrum frá 1891 frameftir verður býráðssalur.

Hann verður í løtuni høvuðsumvældur og kann væntandi takast í nýtslu sum býráðssalur, samstundis sum fyrisitingin flytur av Heiðavegi 26 inn á Høgaból.

Fram hagartil vera býráðsfundirnir hildnir í verandi býráðssali.

Gamli skúli á Glyvrum