Kampus: Fyrsta byggistig kostar 24 mió. kr.

Fyrsta byggistig, nú seturskampus skal gerast á Frælsinum í Havn, skal í mesta lagi kosta 24 mió. kr.

Tá eru projektering og innbúgv tald við.

Barna- og útbúgvingarmálaráðið hevur gjørt uppskot um verklagslóg.

Skúlabygningarnir á Frælsinum, gamli Venjingarskúlin og Læraraskúlin, skulu høvuðsumvælast og umbyggjast. Teir skulu brúkast til kampus hjá Fróðskaparsetrinum.

Námsvísindadeildin, Fróðskaparsetur Føroya, Setrið, Venjingarskúlin

Samlaði kostnaðurin 144 mió. kr. 

Byggiætlanin er í nøkrum stigum, hetta til 2029. Tey kosta 144 mió. kr.

Leigusáttmálin hjá Fróðskaparsetrinum við Tórshavnar havn um Sjóvinnuhúsið fer úr gildi í seinasta lagi 1.september 2027. 

Og hann verður neyvan longdur, tí Tórshavnar kommuna hevur boðað frá, at kommunan ætlar at nýta hølini í Sjóvinnuhúsinum til kommunalu fyrisitingina. 

Miðað verður eftir, at alt virksemi hjá Setrinum í Sjóvinnuhúsinum er flutt á Frælsið á sumri 2025.

Uppskotið hevur sum skilst skund. Tað var sent til hoyringar í gjár. Hoyringarfreistin er tríggjar dagar, hon er til á middegi fríggjadagin.