Felagsskapurin Kyn hevur seksualundirvísing ein blokk um árið í miðnámsskúlunum, og tey siga, at ung sakna meira seksualundirvísing.

Teirra greiða viðmæli saman við øðrum, sum t.d. Føroya politi, apoteksverkinum, Amnesty, Fólkaheilsuráðnum, Gigni, Sig frá o.s.fr. er, at ung eiga at læra meira um eitt nú kropslig mørk og seksuella heilsu.

Í vikuni hava Sig frá og Amnesty Føroyar eisini sent landsstýrismanninum í barna- og útbúgvingarmálum tilmæli um at styrkja læringsøkið, sum eitur "heilsukunnleiki og seksualupplýsing".

Harafturat vaksa tilburðirnir av kynssjúkunum klamydia og gonoré árliga, so Kyn segði í morgunsendingini síðsta fríggjadag, at kanska áttu hítir at verið meira atkomiligar hjá ungum, tí hítir eru besta fyribyrgingin móti kynssjúkum.

Hesum er Djóni Nolsøe Joensen, landsstýrismaður á økinum samdur í.

Vit hoyra, hvat nøkur ung á Glasi halda um seksualundirvísingina og fyribyrging, serliga atkomiligheitina til hítir í dag.

Síðani greiðir landsstýrismaðurin frá, hvussu seksualundirvísingin er skipað í dag, og hvat hann heldur skal kannast og broytast.