Heim til børn og ung við autismu verður dýrari

Almanna- og mentamálaráðið biður løgtingið um fleiri milliónir til búheimið og umlættingarheimið á Argjum til børn og ung við autismu.

29 mió. kr. vóru í 2018 játtaðar til byggingina. Talið fór upp í 39 mió. kr. í 2021.

Nú verður biðið um fýra milliónir aftrat, tí Landsverk hevur staðfest, at byggingin kostar meira enn 39 milliónir.

Eitt nú krevst stuðlamúrur oman fyri bygningina. Og nýggj krøv um brunatrygd eru komin frá Tórshavnar kommunu.

Tríggjar eindir

Byggingin umfatar tríggjar eindir, eina búfólkaeind til seks fólk, eina umlættingareind við seks plássum og eitt dagtilboð til 16 fólk.

Verkætlanin var boðin út í januar 2020. Kostnaðarmetingin tá var 41 mió. kr.

Lægsta tilboðið saman við øðrum útreiðslum var oman fyri 56 mió. kr. 

Arbeiðið var boðið út aftur eftir at broytingar vóru gjørdar.

Nú vóru 39 milliónir nóg mikið, var sagt tá.