Brandur Mortensen Nolsøe, samskipari í Javnstøðunevndini og Demokratia, hevur júst verið á norðurlendskari ráðstevnu um javnstøðu. Evnini eru mong, og tað ber til at hyggja eftir alskyns fyribrigdum við javnstøðubrillum.

Á ráðstevnuni tosaðu tey millum annað um, hvussu tað gongur við javnstøðu í Norðurlondum, sum altíð hava gingið á odda viðvíkjandi javnstøðu millum kynini, og hvørji afturstig eru.

Brandur nevnir harðskap, sum veksur kring allan heimin, millum annað eisini harðskapur, sum menn fremja móti kvinnum.

- Hetta er nakað, sum vit mugu tosa meira um heima í Føroyum eisini, sigur Brandur.

Korona hevur eisini ávirkað kynsjavnstøðu á tann hátt, at fólk fullu aftur í meira siðbundnar kynsleiklutir.

Harafturat eru nógvar stórar avgerðir tiknar uttan nakra kvinnuluttøku í Evropa undir koronatíðini, vísir gransking.

Javnstøðuarbeiðið er ógvuliga samansett og tað eru nógv mál at arbeiða við í Føroyum, sigur Brandur Nolsøe Mortensen.