Google góðkennir ikki føroyskt

- Føroyar og føroyska málið hava ongan týdning fyri Google, og vantandi góðkenningin merkir, at føroyska vinnulívið verður sett í eina ringa støðu, sigur formaðurin í Samskifti, felagnum hjá føroyskum lýsingarfyritøkum, Niels Uni Dam.

Vantandi góðkenningin av føroyska málinum á heimsins størstu leitimaskinu ávirkar arbeiðið og kappingarførið hjá bæði teimum og teirra kundum, tí fyritøkurnar fáa lýsingarnar aftur í høvdið, tí Google ikki skilir føroyskt og tí ikki góðtekur lýsingar á føroyskum.

- Hetta er stórur trupulleiki, sigur Niels Uni Dam, ið tó ikki heldur, at talan er um nakran beinleiðis illvilja frá Google.

- Føroyar og føroyska málið snøgt sagt eru ov smá til, at Google leggur nakað í tað, sigur hann.

Og hóast dúgliga hevur verið arbeitt frá føroyskari síðu, er higartil einki komið burturúr, og framvegis er Google afturlatið land fyri føroyskar lýsingar - um tær væl at merkja eru á føroyskum.