Í gjár kundi Tórshavnar Bátafelag hátíðarhalda 25 ára stovningardag, og í dag er felagið eitt sunt og gott felag við nógvum virksemi, ið gagnar bæði limum og umhvørvinum kring húsið hjá felagnum, sum liggur á Bryggjubakka í Havn. Hetta eru teir tríggir Debes Danberg, Jógvan Bæk og Odd Bjellvåg samdir um. Teir eru allir í nevndini í felagnum og gera nú klárt til at hátíðarhalda stovningardagin við einari veitslu í næsta mánað.

Hjartað í felagnum er húsið, sum felagið eigur og deils leigar út. Tað er í stóran mun bygt við sjálvbodnari arbeiðsmegi, og verður nýtt til alt frá morgunmati til limirnar leygarmorgnar til veitslur og til gestir av bátum at vaska klæðir.

Í Føroyum eru fólk glað fyri at sigla, og sjálvt um bátaplássini í Tórshavnar kommunu nú eru eini 7-800 í tali, so er bíðilistin eftir einum bátaplássi enn langur.

- Felagsskapurin millum tey, sum hava bát, er góður. Umframt teir skipaðu túrarnar, sum bæði hava verið í Føroyum og til útlond, so sigla vit ofta ein, tveir, tríggir bátar avstað til støð í Føroyum, har vit kunnu liggja vikuskifti, og har er eitt gott samanhald, sigur Jógvan Bæk, næstformaður.