Síðani 2018 hevur Justinus Eidesgaard fastað. Tað vil siga, at í 16 tímar etur hann als einki og hinar átta tímarnar, sum eftir eru av samdøgrinum, etur hann tað, honum lystir.

Sambært honum Justinus Eidesgaard eru fleiri fyrimunir við hesum lívsstílinum.

- Tað er ikki tað, at eg gangi gorhungraður. Tað sær út, sum at kroppurin er programmeraður til at liva akkurát soleiðis, sum eg livi í dag. Ofta tá eg havi etið um morgunin ella á middegi, so havi eg lyndi til at blíva linur. Nú eri eg meira kvikkur í tí, sigur Justinus Eidesgaard.

Frá mánadegi til fríggjadag fastar hann, men aloftast etur hann ein góðan morgunmat um vikuskiftið. Og hann merkir ein mun tá.

- Eg eri sindur meira linur tá, tí tað er matur í búkinum. Soleiðis ávirkar tað meg allarmest. Tølini fyri blóðsukrið drøna uppeftir, og tá skal eg eisini brúka meira insulin, sigur Justinus Eidesgaard, sum hevur diabetes týpu 2.

Magni Mohr, professari í fysiologi, vísir á, at ymisk gransking bendir á, at fyrimunir kunnu vera við at fasta júst soleiðis, sum Justinus Eidesgaard ger.

Í morgunsendingini fortelja teir báðir um fyribrigdið at fasta.