Bakkafrost boðað keypsskálanum frá nýggju tøkugjøldunum

Bakkafrost hevur boðað partaeigarunum frá uppskotinum hjá landsstýrinum um tøkugjald.

Í fráboðan til keypsskálan sigur Bakkafrost, at felagið 30.september í fjør boðaði frá møguligum broytingum í tøkugjaldinum. Tað var fyri valið í desember.

Uppskotið um tøkugjaldið er nú til hoyringar til 16.mars. Ætlaða broytingin skal koma í gildi 1.august.

Bakkafrost sigur eisini, at andstøðan í løgtinginum, hevur lagt fram aftur sítt uppskot um tøkugjald.

Hetta er uppskotið, sum andstøðan, sum tá var samgonga, legði fram í september í fjør, og sum Bakkafrost boðaði frá í tíðindaskrivinum 30.september.

Men tað uppskotið datt burtur, tá boðað var frá løgtingsvali.

Í fráboðanini til keypsskálan sigur Bakkafrost, hvørji gjøldini eru í uppskotinum hjá landsstýrinum. 

Grundreglan er tann sama sum í uppskotinum hjá undanfarnu samgongu, sigur Bakkafrost.