Nógvir føroyingar eru berarar av álvarsligum arvaligum sjúkum, uttan vita tað, og møguleikin at kanna hetta er ikki til staðar, tí tilboðið er ikki til. Tu merkir einki til at tú hevur brek í tínum ílegum, so tað er ikki fyrr enn tú fært eitt barn við einum øðrum berara av somu sjúku, at tú finnur útav tí, tí barnið gerst sjúkt.

Tað var hetta, sum hendi hjá Karini Laksáfoss og Sámali Rasmussen, tá dótturin Sága varð fødd. Hon hevði føroysku sjúkuna, sum hevur við sær, at børnini gerast sera sjúk og ikki fáa eitt langt lív.

- Hetta er nakað, sum fólk mugu vita áðrenn tey fáa børn, soleiðis at tey ikki vera tikin av bóli, men kunnu gera sítt fyri at fyribyrgja at tey enda í hesari støðuni, siga Karin og Sámal.

Tey vilja fegin gera sítt við at kunna føroyingar um hesar sjúkur, og hvat kann gerast fyri at forða fyri, at børn verða fødd við álvarsligu arvaligu sjúkunum. Tey hava tí stovnað áhugafelagið Arvasjúkan og gjørt eina heimasíðu, har tey leggja kunning til áhugaði at lesa.

Heimasíðan er at finna her.