Harðskapsmóttøkan byrjar alment 1. juli

Kvinnuhúsið umsitur Harðskapsmóttøkuna, og samstundis er leigumálið við KFUM víðkað, so skott verður millum Kreppumiðstøðina og Harðskapsmóttøkuna

Ráðgevingin í Harðskapsmóttøkuni er byrjað, og starvsfólkini síggja ein støðugan vøkstur av fólki, sum søkja sær hjálp, bæði kvinnur og menn. (Savnsmynd)

Høgni Djurhuus

14.03.2023 - 17:00

1.juli byrjar harðskapsmóttøkan alment.

Men hóast hølini ikki eru klár, og tiltakið tí ikki alment lýst, er virksemið byrjað.

Ráðgevingin er byrjað, og starvsfólkini síggja ein støðugan vøkstur av fólki, sum søkja sær hjálp, bæði kvinnur og menn.

Farið var undir fyrireikingarnar fyrst í 2022, og ein arbeiðsbólkur var settur.

Kvinnuhúsið umsitur Harðskapsmóttøkuna.

300.000 kr. vóru játtaðar í fjør. Í ár er biðið um 650.000 kr.

Almanna- og mentamálaráðið hevur sagt við fíggjarnevndina hjá løgtinginum, at eftir tilmæli frá arbeiðsbólkinum var eitt fulltíðarstarv sett 1.november í fjør.

Kvinnuhúsið, Kreppumiðstøðin

Skott skal vera millum verandi Kreppumiðstøð og Harðskapsmóttøkuna. (Savnsmynd)

Leigumálið víðkað

Samstundis var leigumálið við KFUM, har sum Kvinnuhúsið er, víðkað.

Neyðugt var við tillagingum í hølunum fyri at tryggja, at skott verður millum verandi Kreppumiðstøð og Harðskapsmóttøkuna.

650.000 kr., sum søkt verður um í fíggjarlógaruppskotinum, røkkur til løn og húsaleigu.

Men væntandi koma fleiri útreiðslur, sigur Almanna- og mentamálaráðið.

Starvsfólkini mugu fakliga latast betur í, ávaringarskipan má fáast til vegar, og tilboðini um sálarfrøðiliga hjálp fyri harðskapsrakt fara væntandi at vaksa, nú fleiri søkja sær hjálp.