17 fakfeløg til samráðingar í næstum

17 feløg fara í næstum at samráðast um nýggjan sáttmála við Fíggjarmálaráðið.

Eingin fundur er avtalaður enn, og sambært stjóranum á Lønardeildini, Jan Mortensen, bíða tey, til Fíggjarmálaráðið hevur meldað út karmin fyri nýggjum sáttmálum, sum er á gáttini.

Sambært Ruth Vang, landsstýriskvinnu í fíggjarmálum, fer Fíggjarmálaráðið at senda út tíðindaskriv í dag ella í morgin um, hvat karmurin verður, og hvat liggur í lyftinum um lønarlyft, sum landsstýrið hevur lovað. 

Jan Mortensen sigur, at tey fyrstu, sum koma til samráðingar, verða Føroya Lærarafelag, Akademikarafelagið og Felagið Føroyskir Sjúkrarøktarfrøðingar.