Herbergið fyllir 25 ár í dag

– Ein hin størsta broytingin hesi 25 árini, Herbergið hevur verið til, er tann, at tað eru alsamt yngri fólk, ið hava brúk fyri eini song frá okkum.

Tað sigur Bernhard Petersen, sum situr í stýrinum fyri Herbergið og hevur verið við líka frá byrjan í 1998.

Frelsunarherurin í Norra hevur verið dyggasti stuðulin av øllum hesi árini, tí Norra, Ísland og Føroyar eru partur av somu división.

– Vit høvdu einki megnað uttan tann stuðul og ta hjálp vit hava fingið úr Norra, men nú arbeiða vit fram ímóti, at vit skulu klára fíggingina av Herberginum sjálv, sigur Bernhard Petersen.

25 ára dagurin verður hildin næsta leygardag klokkan 14, tá ið samkoma verður á Herberginum við kaffi og lagkøku, og bæði núverandi og fyrrverandi leiðarar fara at siga frá.

Fyrsti leiðarin í 1998 var Niels Edvard Olsen, og leiðari í dag er Martin Kúrberg.