Nú eru vit nummar 182 av 207 londum

Føroyska landsliðið er í einum aldudali. Tað staðfestir styrkismetingin hjá FIFA.

FIFA kunnger í dag - á ársdegnum fyri sigrinum á Eysturríki í 1990 - ein nýggja styrkislista, sum vísir, at Føroyar  nú eru nummar 182 av heimsins 207 fótbóltslondum.

Hetta er lægsta styrkismeting, Føroyar hava fingið, síðani mars 2009.

60 pláss niðureftir

Sostatt eru Føroyar dotnar 60 pláss niður eftir FIFA-styrkislistanum, síðani Lars Olsen tók við sum landsliðsvenjari 8. november 2011. Tá vóru Føroyar styrkismettar sum nummar 122.

Orsøkin til vánaligu styrkismetingina er, at føroyska landsliðið hevur tapt allar sínar dystirnar, síðani juni 2011. Metingin verður sjey til átta pláss verri, av tí at sigurin móti Litava í september 2009 er meiri enn fýra ára gamal, og telur tískil ikki við longur.

Tað lægsta, Føroyar nakrantíð hava ligið á FIFA-styrkislistanum, er nummar 198, og tað var í september og oktober í 2008.