- Tá eg hyggi aftur, var hetta ein uppliving, sum eg eri ordiliga glað fyri, sigur Guðrun Sólja Jacobsen.

Í dag eru júst 20 ár liðin, síðani hon bleiv kend um alt kongaríkið, tá hon sannførandi vann sangkappingina, Stjerne for en aften.

Sangurin, ið meira enn nakar annar verður settur í sambandi við Guðruna, er Promise Me hjá Beverly Craven.

Tað var Jens Knudsen, kórleiðari í gospelkórinum, sum skjeyt tann sangin upp, sigur Guðrun.

Tann sangurin er vorðin ímyndin av henni, og enn tann dag í dag vilja fólk hoyra hana synga Promise Me.

Tað var tann tíð, tá eg ikki vildi framføra hann, viðgongur Guðrun, men nú hevur hon tikið hann fram aftur.

- Promise Me hevur havt stóran týdning fyri meg, sigur hon.

Í løtuni er Guðrun Sólja Jacobsen á konsertferð í Skotlandi saman við Tvøroyrar hornorkestri.

Lítilátin sum hon er, hevur hon ikki nevnt nakað um, at 20 ár eru liðin síðani sigurin, og tí veit hon ikki, um nakað serligt verður gjørt burtur úr í dag.