JT Electric eitur nú GroAqua

Føroyska fyritøkan JT Electric skiftir nú navn til GroAqua.

Navnaskiftið er ein liður í gongdini at røkka longur út á altjóða marknaðin við burðardyggum vakstrarloysnum til alivinnuna, skrivar fyritøkan í tíðindaskrivi.

Í desember í 2020 keypti JT electric skotsku fyritøkuna Sterner AquaTech UK í sambandi við ætlanir um at fóta sær betur á bretska marknaðinum.

Nú verða førleikarnir í báðum fyritøkunum flættaðir saman í eitt felags brand, sigur fyritøkan.

Aling, Fóðurflakar

Høvuðssætið enn á Kambsdali

Navnið GroAqua er ein samanrenning av orðunum Grow og Aqua, ið avspeglar kjarnuvirksemið í felagnum - at menna vakstrarloysnir til alivinnuna. 

GroAqua hevur høvuðssæti á Kambsdali umframt deildir í Skotlandi, Pólandi og í Danmark - og arbeitt verður við at styrkja støðuna á norska marknaðinum, ið er heimsins størsti alimarknaður. 

Í 2022 var meira enn helmingurin av umsetninginum hjá fyritøkuni frá sølu uttan fyri Føroyar, og loysnir hjá føroysku fyritøkuni verða brúktar av alarum kring allan heimin.

GroAqua hevur framleitt ein film í sambandi við navnabroytingina.