Tingnevndir vilja hava longda tíðarfreist

Bara tvey nevndarálit komu á tingfundinum í gjár.

Tað gongst illa hjá nøkrum løgtingsnevndum at halda tíðarfreistina, sum er ein mánaður, at skriva álit.

Tríggjar nevndir hava biðið um meira tíð.

Fíggjarnevndin hevur biðið formansskapin um longda freist til at skriva álit um 12 mál. Teirra millum er uppskotið um veiðigjøld.

Fíggjarnevndin biður um at fáa freistina at skriva álit um tey 12 uppskotini longda til 8.mai. 

Mentanarnevndin og fýra mál

Mentanarnevndin hevur um biðið um longda freist til fýra mál.

Av serligum orsøkum hevur nevndin ikki havt fund síðani fyri páskir, ikki fyrr enn í dag, tá nevndin hevur fund.

Nevndin biður um freist til 8.mai. 

Millum uppskotini, sum nevndin hevur, eru málini um nýggja bókasavnslóg og um at broyta lógina um dagstovnar og dagrøkt, so pengarnir fylgja barninum.

Príseftirlit og kappingarlóg

Og vinnunevndin vil hava freist til 1.mai at avgreiða uppskotið um príseftirlit.

Ætlanin var annars at avgreiða málið fyri páskir, men nú ætlar nevndin at avgreiða uppskotið saman við uppskotinum um kappingarlóg.