Svínoyingar vilja hava berghol

Svínoyarnevndin vil hava berghol til Havnina og gera havn har.

Havnin er á útnyrðingshorninum á Svínoynni.

Klaksvíkar býráð skal taka støðu til uppskotið í dag.

Nevndirnar hjá býráðnum taka undir við svínoyarnevndini, sum mælir til at senda løgtinginum skriv. 

Tekur býráðið undir við uppskotinum, verður áheitan send løgtinginum. 

Landsverk nevnir tríggjar møguleikar

Landsverk hevur í nøkrum umførum arbeitt við uppskotum um nýggja farleið til Svínoyar.

Tríggir møguleikar eru nevndir.

Ein er nýggj ferjulega við brimgørðum á Eiðinum. Hetta er ivasom verkætlan. Hon er trupul og kostar nógv, stendur í skránni fyri býráðsfundin í dag.

Ferjulega við Havnina

Ein møguleiki er ferjulega við Havnina.

Hon gevur gott reglusemi. Hesin møguleikin er lættur at fremja, tá vegir og berghol eru gjørd.

Og so er rennistrongur til Svínoyar og víðari til Fugloyar ein møguleiki. Men her krevst tó framvegis sjósamband.

Landsverk hevur haraftrat viðgjørt undirsjóvartunnil til Svínoyar.