Lívið snýr seg um fimleik

Um vikuskiftið vann hon sítt níggjunda føroyameistaraheitið.

Tað kom ikki óvart á nakran, tí síðstu nógvu árini hevur Astrið Nanly Breckmann sett stigið í føroyskum amboðsfimleiki við kvinnum.

 - Fimleikur gevur mær so nógv, bæði í høllini og uttanfyri. Alt lívið snýr seg um fimleik so mátin eg livi upp á, er lagaður til fimleikin, sigur 19 ára gamli íðkarin.

 - Tú hugsar nógv um, hvat tú etur og nær tú fert í song. Tað hevur ikki góða tíð at vera saman við vinum, men tað kann mann taka seinni í lívinum.


Venur nógv

Astrið Nanly Breckmann venur tvær ferðir um dagin - umleið 25 tímar um vikuna - og tekur miðnámsútbúgving sína upp á fýra ár, fyri at tað skal bera til.

Hon hevur fingið úrvalspening frá ÍSF, og tí ber til hjá henni at venja og kappast nógv.

Hugurin er góður í løtuni og nógvar kappingar liggja fyri framman, men ikki altíð hevur tað verið eins lætt at fara í venjingarbúnan.

 - Alt lívið hjá mær hevur verið í høllini, og eg royndi at hava frí í tvær vikur og fann útav, at tað kundi eg slett ikki. Eg saknaði tað alt ov nógv, sigur Astrið Nanly Breckmann.


Stór mál

Í FM, sum var í FIMI, kappaðust kvinnurnar í lopið, forskotnari barr, á bita og á gólvi, og Astrið Nanly Breckmann vann sannførandi samanlagt.

Hon hevur kortini ikki tíð til at taka sær av løttum, tí nógv er á skránni í næstum.

 - Vit hava DM um tvær vikur, so hava vit fimleikaoyggjaleikirnar fyrst í juli, norðurevropameistaraheitini, sum helst verða í november, og so ætli eg mær við til EM aftur næsta ár, sigur Astrið Nanly Breckmann.


Úrslit til Føroyameistaraheitini í amboðsfimleiki:

Kvinnur
1. Astrið Breckmann, HF, 46.800
2. Gunnvá Mørkøre, HF, 39.800
3. Sólja við Stein, Støkk, 33.850

Menn
1. Teitur K. í Hjøllum, HF, 63.000
2. Torleivur Christiansen, HF, 54.450
3. Bjarki í Jákupsstovu, Støkk, 45.850

Kvinnuunglingar
1. Mia Højgaard, HF, 43.250
2. Ronja Johannesen, HF, 41.800
3. Hjørdis Petursdóttir, Støkk, 30.500

Mansunglingar
1. Bjarki Johannesen, HF, 66.100
2. Bjarti Skylv Hansen, HF, 12.700

mennfimleikurok.jpg

Frítekst tagging: 

Ítróttur

Fimleikur

Teitur í Hjøllum