Vil ikki seta forboð fyri telefonum í skúlanum

- Tað er ikki rætt at seta forboð fyri fartelefonum í fólkaskúlanum.

Tí tað er í andsøgn við talgildisbúgvingina og búgving annars í skúlans høpi sambært endamálsorðing fólkaskúlans. 

Hinvegin er onki til hindurs fyri at seta reglur um at brúka fartelefon í skúlanum.

Tað sigur Djóni Nolsøe Joensen, landsstýrismaður, í svari til Jóhannis Joensen, løgtingsmann.

Gjørt vegleiðandi reglur

Hann sigur, at Barna- og útbúgvingarmálaráðið hevur eftir fyrispurningi frá skúlunum gjørt vegleiðandi reglur um fartelefon.

Sambært teimum ger skúlastýrið atferðarreglur skúlans í samráði við skúlaleiðaran.

Barna- og útbúgvingarmálaráðið fer í næstum at lýsa vegleiðandi reglur um fartelefonir við tilvísing um, at neyðugt er, at allir skúlar hava ein politikk á økinum. 

Næmingarnir eiga at vera tiknir við upp á ráð.

Djóni Nolsøe Joensen sigur, at hvørki Undirvísingarstýrið ella Nám hava gjørt nakrar ítøkiligar kanningar, um fartelefonin er ein avbjóðing í fólkaskúlanum.