Uppskot: Tunnilspengar at kanna kostnaðarstigið

Meðan dúgliga verður kjakast í hvørjum króki um prísin fyri Eysturoyartunnilin, vilja Tjóðveldi og Javnaðarflokkurin hava ein part av pengunum, sum eru settir av til at fyrireika tunnilin. Pengarnir skulu brúkast til at fáa aðrar prísir enn tunnilsprísir niður.

Flokkarnir vilja hava løgtingið at heita á landsstýrið um at leggja fyri løgtingið eina frágreiðing við tilmælum til, hvørji ítøkilig politisk tiltøk skulu gerast fyri at lækka høga kostnaðarstigið í Føroyum.

Ein millión

Flokkarnir mæla eisini til at brúka eina millión av teimum seks, sum í ár eru settar av til at fyrireika Eysturoyartunnilin. Javnaðarflokkurin royndi júst tað sama í fjør vár, tað er at fáa kannað, hvussu til ber at gera ítøkilig politisk tiltøk, sum kunnu lækka prísirnar í Føroyum.

Men tað vildi samgongan ikki. Í staðin fyri væntaði og vónaði samgongan tá - fyri hálvum øðrum ári síðani - at landsstýrið og vinnan saman fóru at finna okkurt, sum lækkaði prísstigið. Og meirilutin í Vinnunevndini helt eisini, at enn ein kanning fór ikki at lækka nakran kostnað í Føroyum.

Dýrasta land í Evropa

Javnaðarflokkurin og Tjóðveldi siga, at búskaparfrøðingurin, Heri á Rógvi, hevur kannað, hvussu nógv vørur og tænastur kosta í Føroyum. Sambært kanningini eru Føroyar dýrasta land í Evropu at búgva í.

Tað kostar at gera frágreiðingina og tilmælini, sum Tjóðveldi og Javnaðarflokkurin nú vilja hava landsstýrið at gera. Flokkarnir skjóta tí upp at taka eina millión frá Eysturoyartunlinum.

2,2 mió. brúktar

Rigmor Dam og Bjørt Samuelsen, løgtingskvinnur, sum fyri flokkar sínar hava fram lagt uppskotið um kostnaðarstigið, siga, at bara ein lítil partur er brúktur av teimum seks milliónunum, sum í ár eru játtaðar at fyrireika tunnilin millum Eysturoynna og Streymoynna.

Sambært upplýsingum, Útvarpið hevur fingið frá Landsverki, sum umsitur pengarnar, eru okkurt um 2,2 milliónir brúktar.