Tilmæli um skannaran kemur 25. mai

Arbeiðsbólkurin, sum ger fakligt tilmæli um skannaran í Klaksvík, skal vera liðugur fyri 25.mai.

Tað sigur Margit Stórá, landsstýriskvinna, í svari til Elsebeth Mercedis Gunnleygsdóttur, løgtingskvinnu.

Leiðslan í Sjúkrahúsverkinum skal hava tilmælið. Tá hon er liðug at viðgera tað, verður tað sent landsstýriskvinnuni.

Margit Stórá sigur, at eingin munur er á at geva Landssjúkrahúsinum eina gávu og geva Klaksvíkar sjúkrahúsi eina gávu,

Elsebeth Mercedis Gunnleygsdóttir

Elsebeth Mercedis Gunnleygsdóttur, løgtingskvinna, spurdi um skannaran, sum ætlanin er at lata Klaksvíkar sjúkrahúsi.

Reglurnar eins í øllum Sjúkrahúsverkinum

Reglurnar um at taka móti gávum eru eins í øllum Sjúkrahúsverkinum og á øllum stovnum landsins. 

Tá talan er um gávur av hesum slagi, sum skannarin er, eigur málið at vera upplýst og síðani viðgjørt, sigur landsstýriskvinnan.

Hon vísir til roknskaparvegleiðing um fremmanda fígging.

Har stendur, at meginreglan er, at almennur stovnur kann ikki átaka sær uppgávur og skyldur, sum vera fíggjaðar uttanífrá, uttan so, at játtandi myndugleikin, sum er løgtingið, veit tað.

Tí skulu útreiðslur og inntøkur, sum standast av virksemi, sum verður fíggjað aðrastaðni, vera við í fíggjarlógini og í játtanarroknskapinum.

Margit Stórá

Margit Stórá, landsstýriskvinna, hevur svarað fyrispurningi frá Elsebeth Mercedis Gunnleygsdóttur.