Løgmaður: Eingin ósemja um arbeiðið í Sandoyartunlinum

Einki bendir í løtuni á, at Sandoyartunnilin ikki verður liðugur til sáttmálasettu tíðarfreistina, sum er á nýggjárinum. 

Tað sigur Aksel V. Johannesen, løgmaður, í svari til Jacob Vestergaard, løgtingsmann.

Hann spurdi, um ósemja er millum Eysturoyar- og Sandoyartunnil og NCC um at gera  Sandoyartunnilin lidnan.

Jacob Vestergaard spurdi eisini, um NCC drálar við at gera Sandoyartunnilin lidnan, og um undirarbeiðstakarar ikki sleppa framat, fyrr enn NCC er liðugt við sítt arbeiði.

Hann sigur, at arbeiðið hevur gingið skjótari enn tíðarætlanin.

Ósemja skal vera um møguligt bonus til NCC, um NCC letur tunnilin fyri ásettu tíðina.

Løgmaður svarar, at í løtuni er ikki nøkur ósemja um at gera sjálvan tunnilin lidnan.

Hann sigur eisini, at undirarbeiðstakarar hava verið í Sandoyartunlinum eftir avtalu við  høvuðsarbeiðstakaran, NCC. 

Ætlandi fara teir aftur í tunnilin, tá arbeiðið hjá høvuðsarbeiðstakaranum er komið longri.  

Í løtuni riggar tann eini undirarbeiðstakarin seg til uttan fyri tunnilin á Gomlurætt.