Ikki búskaparliga skilagott at stytta arbeiðsvikuna

Tað er ikki búskaparliga skilagott at stytta arbeiðsvikuna.

Tað sigur Froði Magnussen, formaður í Búskaparráðnum.

Hann skrivar í grein, at styttri arbeiðsvika fer at krevja meiri pening og fleiri hendur, og tað er longu sum er ein avbjóðing í búskapinum.

Stórur tørvur er á arbeiðsmegi, og tørvurin fer at vaksa næstu árini.

Leggur størri trýst á arbeiðsmarknaðin

At stytta arbeiðsvikuna fer at leggja enn størri trýst á arbeiðsmarknaðin, og tað er ikki búskaparliga skilagott, sigur Fróði Magnussen.

Hann mælir í staðin til at linka trýstið á búskapin.

Uppskotið um at stytta arbeiðsvikuna fer at hækka lønarkostnaðin munandi, bæði í vinnuni og almenna geiranum, og tað hevur við sær, at fíggjarpolitiska haldførið versnar.

Mugu útvega fígging

Formaðurin í Búskaparráðnum sigur, at skal arbeiðsvikan styttast úr 40 tímum niður í 37 tímar, er neyðugt, at politiski myndugleikin útvegar fígging, tí tað er ikki ókeypis.

Og samfelagið noyðist samstundis at finna aðrar loysnir á vaksandi starvsfólkatrotinum, skrivar Fróði Magnussen, formaður í Búskaparráðnum.

Les alla greinina her.