Le Bellot liggur nú við bryggju á Tvøroyri

Franska ferðamannaskipið, Le Bellot, sum bar við land á Tvøroyri í gjár, liggur nú við bryggju har.

Sleiparin hjá MEST fór suður, og hann sleipaði skipið út frá.

Skipið bar við land í grótbrotinum beint við Delta Seafood um eitt tíðina í gjár, og megnaði ikki sjálvt at sleppa av aftur í nógva vindinum.

Ein hvirla tók skipið móti landi.

Loðsur var umborð, tá óhappið hendi. 

Kavarar hava verið niðri og kannað botnin á skipinum.

Ikki nevniverdur skaði

Skipið lekur ikki og hevur, sum skilst, ikki fingið nevniverdan skaða.

Le Bellot liggur á Tvøroyri enn. Ikki er greitt, nær skipið fer haðani.

Tað skuldi annars fara í gjárkvøldið. 

Le Bellot er 130 metrar langt.  Umborð eru 100 ferðafólk, og manningin telur eisini hundrað fólk. 

Eingin teirra fekk skaða, tá skipið bar við land, og ikki var neyðugt hjá teimum at fara av skipinum.