Mike Pence ætlar at stilla upp til forsetavalið

Fyrrverandi varaforsetin í USA, Mike Pence, ætlar at stillar upp til forsetavalið. 

Tað siga keldur, sambært sjónvarpsrásini NBC.

Eisini tíðindastovan Reuters sigur tað sama frá keldum.

Mike Pence, sum í fýra ár var varaforseti hjá Donald Trump, fer nú upp í stríðið at gerast forsetavalevni fyri Repulikanska flokkin.

Hetta verður væntandi kunngjørt 7. juni.

Pence er konservativur kristin. Trump valdi hann til varaforseta, tá ið hann var guvernørur í statinum Indiana í 2016. 

Hann hevur, sambært NBC, leingi verið ein av ídnastu leiðarunum fyri at fremja konservativan politikk, eitt nú strong tiltøk í sambandi við rættin hjá kvinnum at fáa fosturtøku og fyri at avmarka rættindi hjá samkyndum.

Trump á odda

Í løtuni er Trump á odda í meiningakanningum - framman fyri guvernørin í Florida, Ron DeSantis.

Móti endanum av tíðini hjá Trump og Pence í Hvítu húsunum, eftir at teir høvdu tapt valið fyri Joe Biden, sýtti Trump fyri at góðkenna valúrslitið.

Tað endaði við, at viðhaldsfólk hansara 6.januar 2021 lupu á amerikanska kongressbygningin. Fleiri róptu rakstrarróp, eitt nú 'Heingið Mike Pence', tá ið tey ólógliga tóku seg inn í bygningin í Washington.

Mike Pence sat í Senatinum inni í kongressbygninginum henda dagin, har hann skuldi standa á odda fyri at telja upp valmansatkvøðurnar.

Kongressin, Capitol Hill, Ófriður uttan fyri Kongressina

Álopið á amerikansku kongressina kravdi sjey mannalív. (Mynd: Ritzau Scanpix)

Skúgva grundlógina til viks

Undan álopinum á Kongressina, hevði Trump lagt trýst á Pence fyri at fáa hann at skúgva til viks grundlógina, vraka sigurin hjá Biden og senda atkvøðurnar aftur til statirnar. 

Men Mike Pence gjørdi ikki, sum Trump segði.

Stutt fyri álopið, skrivaði Pence m.a. í einum boðum á Twitter, at hann fór ikki at forða fyri, at Biden formliga skuldi góðkennast.

Pence hevur sagt, at Trump hevur ábyrgd av sínum leikluti í álopinum á Kongressina.

Í minsta lagi sjey fólk lótu lív í sambandi við álopið.