Kunnu framleiða orku úr matleivdum

Biogassverkið Førka kann nú framleiða orku úr matleivdum frá hotellum, heilsølum, matvøruhandlum og øðrum. 

Tað vísir úrslitið av nýggjari royndarverkætlan.

Verkætlanin er samstarv millum Førka, hotell, heilsølur og Tórshavnar kommunu.

- Samstarvið vísir, at vit hava útgerðina at taka ímóti matleivdum og skapa orku úr matvørum, sum annars fara fyri skeytið. 

Mannagongdin er, at fyritøkur og stovnar við nógvum matleivdum skilja lívrunnið burturkast, og Tórshavnar kommuna heintar hetta serskilt til okkum, sigur Fróði Mortensen, rakstrarleiðari hjá Førka.

Næsta stig er at fáa fleiri aktørar við,eitt nú matvøruhandlar, sigur Fróði Mortensen.