Zelenskyj váttar, at stórálopið er byrjað, men vil ikki fara í smálutir

Á tíðindafundinum boðaði kanadiski forsætisráðharrin frá, at landið letur Ukraina nýggjan milliardapakka í hernaðarhjálp, skrivar Reuters.

Umframt lyftið um 500 milliónir kanadiskar dollarar, - tað svarar til 2,6 milliardir krónur, sigur Trudeau, at Kanada verður við í altjóða samstarvinum, sum skal upplæra ukrainskar flogskiparar at flúgva jagaraflogfør.

Forsætisráðharrin segði, at Kanada legði í fjør hald á eitt russiskt farmaflogfar, sum lendi í Kanda, og nú byrjar tilgongdin at lata Ukraina flogfarið.

Kanada er eitt av londunum uttanfyri Ukraina, har flestir ukrainar búgva og fólk, sum eru ættað úr Ukraina.

Putin veit

Russiski forsetin Vladimir Putin váttar fyri Ria Novosti-tíðindastovuni, sum russiski staturin stýrur, at ukrainska stórálopið er byrjað.

Zelenskyj vildi á tíðindafundinum ikki viðmerkja útsøgnina hjá Putin, annað enn, at vátta, at nú eru mótálop í gongd.

- Tað er áhugarvert, sum Putin sigur um mótálopið hjá okkum. Men tað er umráðandi, at Russland altið kennir tað, sum um tey ikki hava nógv tíð eftir, - tað haldi eg, segði Zelenskyj.

Seinastu dagarnar hava harðir samanbrestir verið fleiri staðni á hermótinum. Zelenskyj sigur, at hann hvønn dag hevur samband við herleiðarar á hermótinum.