Ibrahimovic spilti føroyska ballið

Hóast Føroyar komu á odda 1-0, endaði dysturin við 2-1 sigri til sviar. Zlatan Ibrahimovic var avgerandi munurin

Zlatan Ibrahimovic skoraði eitt, og legði upp til eitt mál í 2-1 sigrinum á Føroyum

12.10.2012 - 21:01

<p>Umleið 5000 áskoðarar sóu føroyska landsliðið spæla ein tann besta dystin nakrantíð. Tíverri endaði tað allíkavæl við, at Svøríki vann dystin við einum máli.</p><div><br></div><div>Føroyar skaptu fleiri málmøguleikar í dystinum, og tá seinni hálvleikur var 12 minuttir gamal, bleiv ein teirra umsettur til mál. Jónas Tór Næs kastaði eitt innkast inn í svenska brotssteigin, Pól Jóhannus Justinussen longdi við høvdinum til Rógva Baldvinsson, og við góðum skoti legði hann Føroyar á odda.</div><div><br></div><div>Bara fáar minuttir seinni fær Jónas Tór Næs álvarsligan skaða í andlitið, og má av vøllinum. Sum skilst bleiv hann seymaður í skiftirúminum. Føroyar spældu í meira enn fimm minuttir við 10 ímótti ellivu, og tað var ov leingi. Tí stutt fyri ,at Jónas Tór Næs kemur aftur á vøllin (við trimum pentum) javnar innskifti Alexander Kacaniklic fyri Svøríki. Zlatan Ibrahimovic átti helvtina av málinum, tí avleveringin til Kacaniklic var framúr góð.</div><div><br></div><div>Tað bleiv eisini  Zlatan Ibrahimovic, sum spilti føroyska ballið. Tá eitt korter var eftir av dystinum bleiv hann, á markinum til rangstøðu, spældur púra fríur og skoraði sigursmálið hjá Svøríki.</div><div><br></div><div>Tað er eingin skomm at tapa 1-2 fyri Svøríki, tað hava nógvar aðrar tjóðir roynt. Men nú dysturin er liðugur er tað allíkavæl eitt vónbrot, tí munurin á liðunum var lítil og eingin. Fyri at siga tað sum tað er, so var avgerandi munurin Zlatan Ibrahimovic, sum umframt at skora og leggja upp til mál, eisini sendi nakrar kanónkúlur eftir føroyska málinum, sum Gunnar Nielsen tó bjargaði hvørja ferð.</div><div><br></div><div>Føroyski verjuleikarin, Odmar Færø, sum spældi sín fjórða landsdyst, segði aftan á dystin við sjónvarpið, at hann var sera nøgdur við føroyska avrikið, men hann var vónbrotin um úrslitið</div><div><br></div><div>Føroysku spælararnir blivu klappaðir av vøllinum av føroysku áskoðarunum, og tað høvdu teir eisini uppiborið. Sjáldan, ella kanska ongantíð, hevur føroyska landsliðið spælt ein so góðan dyst móti einari aðrari tjóð við somu styrki sum Svøríki.</div><div><br></div><div>Týskvøldið spæla Føroyar og Írland. Vónandi verður avrikið líka gott tá.</div><div><br></div><div><i>Mynd: Faroephoto.com</i></div>