Nógv hava hoyrt um seglskipið Salka Valka millum annað úr bókini "Ferðin um bláu gongustjørnuna", sum Durita Holm gav út í 1999, og sum snýr seg ferð hennara ferð kring knøttin við seglskipinum.

Salka Valka varð seld av landinum fyri nógvum árum síðani, men fyri einum ári síðani kepti beiggi Duritu, Bjørn Holm, skipið. Hetta var í samband við, at hann legði til rættis eina ferð til Svalbard við familjuni.

Ferðina til Svalbard hevur Bjørn droymt um í nógv ár, tí sum 16 ára gamal búleikaðist hann í ein heilan vetur sum veiðimaður á Svalbard. Upplivingarnar har hava havt so stóran týdning fyri Bjørn, at hann leingi hevur droymt um at vísa familju síni tey støð, hann vitjaði sum unglingi.

Og í vár gjørdist dreymurin um at vitja Svalbard við seglskipi veruleiki. Bjørn og Mikkjal Helmsdal silgdu Salka Valku til Svalbard, og síðani hava Bjørn, kona hansara og synirnir ferðast har við seglskipinum.

Nú tey skjótt fara at sigla aftur til Føroya, og hevur Bjørn lýst Salka Valku til sølu.

Lurtið eftir samrøðuni við Bjørn, sum vit fingu orðið á týsdagin, tí tá stóð hann á einum fjallatoppi á Svalbard, har telefonsambandi var gott.

Í 2000 gjørdu Durita Holm og Erik Torjusen eina sjónvarpssending í seks pørtum um teirra ferð við Salka Valku kring knøttin.
Til ber at hyggja at sendirøðini her