Kærdi um internetsambandið umborð á Norrønu

Tað er ikki bara sum at siga tað at hava internet á sjónum.

Tað skilst, nú Brúkaraumboðið hevur viðgjørt eitt mál um internetsambandið umborð á Norrønu.

Ferðafólk gjørdi vart við, at internetsambandið umborð á Norrønu er als ikki so gott, sum lýst var.

Smyril Line vísti á, at tekniskt er avbjóðandi og sera kostnaðarmikið at bjóða internet á sjónum. 

Felagið vísir á, at í lýsingini hjá felagnum verður fyrivarni tikið fyri, at internetsamband á opnum havi hevur sínar avmarkingar.

Rannvá Sólheim

Rannvá Sólheim er Brúkaraumboð.

Skulu áhaldandi eftirmeta

Brúkaraumboðið heldur, at Smyril Line í stóran mun hevur gjørt tað, tey kunnu, fyri at upplýsa um, at avbjóðingar eru við internetsambandi á opnum havi. 

Heitt verður tó á Smyril Line um áhaldandi at eftirmeta, um felagið hevur nóg mikið av kapasiteti í mun til seldu internethaldini.

Tað er týdningarmikið, at ferðafólk ikki verða villleidd til at keypa eina vøru, sum tey ikki fáa, sigur Brúkaraumboðið.

Brúkaraumboðið hevur mælt Smyril Line til at upplýsa, at tøki kapasiteturin verður býttur javnt millum tær eindir, sum til eina og hvørja tíð eru virknar.

Smyril Line hevur boðað frá, at felagið tekur niðurstøðuna til eftirtektar.

Brúkaraumboðið ger tí ikki meira við málið.