Jenis heitir á Biden um at sleppa ætlanini um tyssibumbur

Jenis av Rana, formaður í Miðflokkinum, hevur sent amerikanska sendiharranum í Danmark, Alan Leventhal, eina umbøn, sum er ætlað amerikanska forsetanum, Joe Biden.

Í skrivinum biður Jenis av Rana forsetan vinarliga umhugsa støðuna av nýggjum, og taka avgerðina um at senda tyssibumbur til Ukraina aftur.

Jenis av Rana skrivar til amerikanska forsetan vegna Miðflokkin.

Størri ræðuleikar

Formaðurin sigur, at tað, sum tey óseku, sivilu fólkini í Ukraina og í Russlandi hava verið fyri seinastu 16 mánaðirnar, er skammiligt fyri altjóða samfelagið, og tað ber ikki til at fordøma hetta nóg harðliga.

Jenis av Rana sigur víðari í brævinum, at tað at senda altoyðileggjandi vápn, sum tyssibumbur eru, merkir, at ræðuleikarnir fara at økjast enn meira, og at hetta fer at oyðileggja nógv, eisini framtíðar ættarlið.

Í staðin fyri at styrkja menna kríggið á henda hátt, spyr Jenis av Rana, um amerikanska tjóðin kann gera eina semingsroynd aftrat, so kríggið fær ein enda.