G!: Tamara tøldi Syðrugøtu

"Er hon føroyskt," spurdi ungi maðurin í gummistyvlum og Helly Hansen-jakka ovfarin, tá Tamara Malena Mneney úr Fuglafirði takka áhoyrarunum fyri stuðulin eftir ein sang. 

G! 2023, Tamara

Jú, sanniliga er Tamara føroysk, men tað hoyrist ikki á tónleikinum, ið hon framførdi á G! festivalinum í kvøld, sum er altjóða R&B- og hiphop-tónleikur. 

Tamara hevur evnini til at røkka langt út um bæði føroysku og donsku landoddarnar.

G! 2023, Tamara, Áhoyrarar

Hon hevur ein rødd, ið er egin og tølandi, og Tamara er í holt við at savna saman eitt spennandi savn av sangum. 

Einasta neiliga á G! framførsluni var, at Tamara hevði valt at seta framúrskarandi poppsangin "I Should Have Known Better" niður í ferð. Eingin orsøk til tað, tí sangurin klæðir munandi betur at verða framførdur sum hann er innspældur. 

Seinastu árini hevur Tamara búð í Danmark, har hon ger meira og meira vart við seg. 

G! 2023, Tamara

Tíðin arbeiðir fyri føroyska stórtalentinum, ið enn er eitt sindur trilvandi og smæði á pallinum. Tað er eins og Tamara er í holt við at venja seg við leiklutin sum stjørna á pallinum. 

G! 2023, Tamara

Tamara skal ikki ivast og bara ognartaka pallin, tí hon hevur alt, ið skal til, fyri at hertaka tónleikapallin.