Ber ikki til at verja seg fyri øllum óhappum

At Atlantis Airways onga tyrlu hevur til bjarging ella leiting í løtuni, er einki at gera við. Tað ber ikki til at verja seg út í æsir fyri óhappum.

Tað sigur landsstýrismaðurin í tilbúgvingarmálum, Jacob Vestergaard.

Føroyar hava onga bjargingartyrlu havt síðani mikudagin. Onnur tyrlan hevur verið til umbyggingar í nógvar mánaðir. Tyrlan er liðug og kann fyri tað fara á flog. Men góðkenningin frá flogmyndugleikanum er ikki komin enn. Hin tyrlan fekk eitt brek mikudagin, og hon fær tí ikki flogið. Eykalutir eru bílagdir. Hetta er harmiligt, men gerst ikki við, heldur landsstýrismaðurin, men hann fær einki gjørt við støðuna.

Kostar 36 mió. kr.

Atlantic Airways rekur tyrluflúgvingina fyri landið. Í sáttmála við landsstýrið hevur felagið bundið seg til at røkja innanoyggaflúgving, leiting og bjarging. Fyri hetta fær Atlantic Airways 36,1 millión krónur um árið. Sáttmálin forðar tó ikki fyri, at eingin tyrla er tøk í landinum.

Og fyri at gera ilt verri fór tyrlan hjá donsku sjóverjuni úr Føroyum fyri stuttari tíð síðani. Hon verður ikki í Føroyum aftur fyrr fyrst í 2014.