UNESCO: Fartelefonir hoyra ikki heima í skúlastovum

Fartelefonir eiga ikki at vera í skúlastovum.

Tað sigur UNESCO, sum er ST-stovnurin fyri útbúgving.

Fráboðanin kemur í kjalarvørrinum á nýggjari frágreiðing, sum sambært The Guardian vísir, at ov nógv tíð við fartelefonum minkar um førleikan at læra.

Fartelefon, Snildfon, Børn

Eitt forboð móti fartelefonum í skúlastovum fer, sambært UNESCO, at hjálpa skúlum at fáa frið í flokkunum, betra um læringarevnini og verja børn ímóti happing á netinum.

Sambært UNESCO, so hava seks lond forboð ímóti snildfonum í skúlanum.

Í Danmark og Føroyum er tað upp til skúlarnar sjálvar um teir vilja seta forboð ella ikki.

Vegleiðandi reglur í Føroyum

Barna- og útbúgvingarmálaráðið hevur eftir áheitan frá skúlunum gjørt vegleiðandi reglur um fartelefon.

Sambært hesum reglum, so orðar skúlastýrið atferðarreglur skúlans í samráði við skúlaleiðaran.

Landstýrið 2022/23, Djóni Nolsøe Joensen

Í mai segði Djóni Nolsøe Joensen, landsstýrismaður, at tað er ikki rætt at seta forboð fyri fartelefonum í fólkaskúlanum.

Tað er í andsøgn við talgildisbúgvingina og búgving annars í skúlans høpi, sambært endamálsorðing fólkaskúlans. 

Tað segði landsstýrismaðurin í svari til Jóhannis Joensen, løgtingsmann.