- Tíðindi, mentan og ítróttur
Kanning: Ov vánalig stýring í Mentamálaráðnum
<div>Tað eru vánalig skoðsmál, starvsfólkini í Mentamálaráðnum geva av sínum egna arbeiðsplássi. Tað vísir ein kanning, sum fyritøkan 2Improve hevur gjørt av viðurskiftunum í ráðnum fyrra hálvár í ár.</div><div><br></div><div>Mentamálaráðið skrivaði í januar undir sáttmála við fyritøkuna 2Improve um at gera kanningar av ráðnum, og at gera uppskot til nýggjan bygnað, sum skal fáa ráðið at virka betur.</div><div><br></div><div>Ein av grundarsteinunum undir niðurstøðunum hjá 2Improve, eru samrøður við nøkur starvsfólk, leiðarar og landsstýrismann. Og hesi eru rættiliga samd um, hvat bagir:</div><div><br></div><div><b>Ov vánalig stýring</b></div><div><br></div><div>Stýringin er ov vánalig. Til dømis dugir ráðið ikki nóg væl at fyrireika og útinna verkætlanir, ov lítið yvirlit er yvir samlaðu uppgávurnar í ráðnum, og tær eru ikki nóg greitt raðfestar - ov nógv tíð verður brúkt at sløkkja eld. </div><div><br></div><div>Starvsfólkini kenna ov illa fremstu málini hjá ráðnum og sær sjálvum, og býtið av avgerð og ábyrgd er ógreitt. Haraftrat eru fundirnir ov illa skipaðir, og kunningin er ov vánalig.</div><div><br></div><div>Starvsfólkini hava ov nógv at gera, og hetta ger, at leiðslan ofta sjálv noyðist upp í málsviðgerðina. Bunkarnir á borðinum hjá starvsfólkunum hópa seg upp, og málsviðgerðin tekur ov langa tíð - í meðal hálvan triðja mánað.</div><div><br></div><div><b>Eisini glottar</b></div><div><br></div><div>Men so eru eisini ljósglottar: Samstarvið í ráðnum er gott, starvsfólkini hava frælsi og álit, og tey kenna væl tørvin hjá viðskiftafólkunum. Í juni kemur so 2Improve við uppskoti um nýggjan bygnað í Mentamálaráðnum, sum skal bøta um tænastuna hjá ráðnum og arbeiðsumstøðurnar hjá leiðslu og starvsfólki.</div><div><br></div><div>Millum annað mælir 2Improve til, at arbeiðið í ráðnum verður skipað í toymum. Tað skal skiljast millum menning, verkætlanir og rakstraruppgávur. Og starvsfólk, skúlar og stovnar skulu hava størri ábyrgd.</div><div><br></div><div><b>Fimm toymi</b></div><div><br></div><div>Mentamálaráðið skal í framtíðini stýrast við fimm toymum, mælir 2Improve til. Einum leiðslutoymi, fyrisitingartoymi, avrikstoymi, starvsfólka- og lógartoymi og einum menningartoymi. Fyrimunurin við at arbeiða í toymum er, at fleiri taka ábyrgd, har eru ymiskar áskoðanir og mentanir og at ymiskleikin ger toymini sterk, sigur 2Improve. </div><div><br></div><div>Eftir ætlan skuldu uppskotið um nýggjan bygnað setast í verk í september, men av tí at Mentamálaráðið fekk nýggjan aðalstjóra í august, er arbeiðið útsett. Nýggi aðalstjórin, Poul Geert Hansen, sigur, at broytingar verða gjørdar í uppskotinum og at tað væntandi verður sett í verk í november.</div><div><br></div><div><br></div><div><br></div><div><br></div><div> </div><div><br></div><div><br></div>
