Ítróttahallir fara at hava opið frá morgni til myrkurs

Fýra ítróttahallir í Tórshavnar kommunu fara nú at hava opið frá klokkan sjey á morgni til midnátt, allar dagar í vikuni.

Talan er um royndarverkætlan til nýggjárs, sum fevnir um høllina á Hálsi, Gundadalshøllina, Hoyvíkshøllina og høllina í Kollafirði.

Fyribils verða ítróttahallirnar í skúlanum á Argjahamri og skúlanum á Fløtum ikki við í skipanini, tí har krevjast onnur atkomuviðurskifti enn tey verandi. Arbeitt verður við hesum, sigur Tórshavnar kommuna.

Stongdar tríggjar vikur

Eydnast royndarverkætlanin væl, so er ætlanin, at hallirnar bert verða stongdar tríggjar vikur um summarið, tá umvælingar skulu gerast, umframt ávísar halgidagar, sigur Heðin Mortensen, borgarstjóri.

Skúlar, frítíðarskúlar og dagstovnar brúka vanliga hallirnar gerandisdagar í skúlatíð. Síðani er skipað ítróttavirksemi, tað vil siga venjingar og kappingar, til kl. 22, og stundum til kl. 23, eisini um vikuskiftið.

Kunningarskíggjar

Men tað eru eisini nøkur glopp til frítt spæl, sigur kommunan,  og nú verður upplatingartíðin longd til kl. 24.

Í hesum sambandi verða kunningarskíggjar settir upp í hallunum, so at til ber at síggja, hvørjar tíðir eru tøkar tann dagin.

Á heimasíðuni ítrott.fo ber eisini til at síggja tíðirnar fyri hvørja einstaka høll.

Meiri verður at frætta í útvarpstíðindunum klokkan 18.