Ákærd fyri at órógva almenna ferðslu í Nólsoy

Fýra fólk eru ákærd fyri grovt at órógva almenna ferðslu í Nólsoy fyrst í september 2019.

Málið er farið í Føroya rætt.

Tá Ternan var á veg til Nólsoyar seinnapartin sunnudagin 1.september 2019 ringdi fólk úr Nólsoynni til løgregluna og boðaði frá, at nólsoyingar ætlaðu at seta tiltøk í verk, tá Ternan legði at.

Millum annað fekk løgreglan boð um, at fólk ætlaðu at binda Ternuna.

Hetta innslagið um mótmælið hjá nólsoyingum, sum ikki gekk sum ætlað, var í Degi og viku mánadagin 2. september 2019. 

Seta bil á portrið

Tá so portrið var latið upp, var ætlanin at seta ein bil á portrið, so tað ikki kundi latast aftur, og Ternan tí ikki slapp frá landi.

Tey boðini sendi løgreglan til MRCC, sum síðani setti seg í samband við skiparan á Ternuni og greiddi honum frá ætlanunum.

Tað var helst orsøkin til, at skiparin gjørdi av ikki at lata portrið upp, tá Ternan kom til Nólsoyar. Okkurt um 40 fólk sluppu ikki í land.

Fór seint um kvøldið

Ikki fyrr enn klokkan trý korter til tíggju um kvøldið fór Ternan úr Nólsoy.

Fyrrapartin dagin eftir var eingin sigling á nólsoyarleiðini.

Nú næstan fýra ár seinni eru fýra fólk ákærd í tí sambandi fyri at bróta revsilógina, millum annnað fyri grovt at órógva almenna samferðslu.