Høgni Lisberg G!-tónleikastjóri

G! Festivalurin hevur sett Høgna Lisberg í starv sum tónleikastjóra.

Hetta upplýsir G! festivalurin á heimasíðuni í kvøld. 

Avtalan er fyribils galdandi í eitt ár.

Tað vil siga, at tað verður Høgni Lisberg, sum skal standa fyri at velja tann tónleikin, ið verður at hoyra á G! festivalinum í 2024.

Høgni Lisberg, Í luftini

41 ára gamli leirvíkingurin hevur drúgvar og viðkomandi royndir innan tónleik. 

Høgni Lisberg er sangari, sangskrivari, gittarleikari, trummuspælari, framleiðari og tónleikaútgevari.

Har umframt hevur nýggi G!-tónleikastjórin ein bachelor í tónleikaútbúgving frá rútmiska tónleikaháskúlanum í Keypmannahavn. 

G! festival

G! festivalurin ger eisini vart við, at tað hevur týdning fyri festivalin, at Høgni Lisberg hevur eitt sera tætt tilknýti til G!. 

Høgni Lisberg var nevniliga trummuspælari í legendariska rokkbólkinum Clickhaze, og Clickhaze og G! spruttu burtur úr umhvørvinum kring tónleikasamtakið Grót um aldarskiftið.

G! festival, G! logo, G! festivalurin

Í grundini vóru tað limirnir í Clickhaze, sum tóku stig til G! festivalin. 

"Helst hevur Høgni spælt á øllum G! Festivalum, sum hava verið, antin sum trummuspælari ella sum sangari, og kennir hann tí væl leistin, sum festivalurin koyrir eftir," skrivar G! festivalurin á heimasíðuni. 

G! 2023, Honningbarna

"Báðir partar eru sjálvsagt sera spentir um nýggja samstarvið, og síggja fram til eina spennandi skrá í komandi árið. G! verður hildið dagarnar 18.-20. juli 2024," skrivar G! á heimasíðuni.