Skal verða verandi í varðhaldinum

Maðurin, sum er dømdur fyri í tveimum førum at hava havt samlegu við gentu, sum var yngri enn 15 ár, slapp ikki úr varðhaldinum, tá dómurin var sagdur mánadagin.

Hann hevur verið í varðhaldi síðani 5.juli.

Føroya rættur tók undir við ákæranum, sum kravdi, at har verður hann verandi.

Maðurin kærdi tann úrskurðin til Landsrættin.

Tríggjar ferðir

Maðurin, sum er fyrst í tríatiárunum, er ákærdur fyri tríggjar ferðir at hava havt samlegu við gentu, sum var 13-14 ára gomul.

Hann var dømdur í tveimum málum og frídømdur í einum.

Revsingin er sjey mánaða treytaleys fongsulsrevsing.

Maðurin noktar seg sekan í øllum ákærunum.