Hanna Jensen aftur í løgtingið

Hanna Jensen hevur tikið sæti aftur í løgtinginum.

Tað boðar hon frá á sínum Facebook-vanga.

Hon sigur, at hetta er ikki ein løtt støða, tí at arbeiða sum rektari á Kambsdali sær hon sum sítt lívsstarv.

Men umstøðurnar hava elvt til, at hon kennir tað sum sína skyldu at vera í løgtinginum nú, skrivar hon.

Ætlaði at gevast í landspolitikki

Hanna Jensen, sum hevur sitið á tingi fyri Framsókn, síðani landsstýrið varð skipað, boðaði 23. juni frá, at hon fór úr landspolitikki. Orsøkin var, at hon valdi at taka viðaftur starvinum sum rektari á Kambsdali tann 1. august.

Tá tingið varð sett á ólavsøku, var Hanna Jensen tó millum tingfólkini.

2. august boðaði hon so frá, at hon fór í farloyvi úr løgtinginum.

Og nú góðan mánað seinni, hevur Hanna Jensen aftur tikið sæti á tingi.

Hanna Jensen er nummar fimm á listanum hjá Framsókn og fekk 111 atkvøður.