Á dagstovninum við Stórheygg í Hósvík er tað ikki bert námsfrøðin og børnini, sum fylla í gerandisdegnum. Har verður eisini gjørt nógv fyri at vera ein umhvørvisvinarligur stovnur. Hetta hevur eisini eydnast teimum so mikið væl, at tey í fjør vunnu heiðurin sum "ársins grøni stovnur".

Innbúgv v.m. verður keypt í endurnýtslu handlum, og eisini eru foreldur røsk at luta ting til stovnin, sum børnini kunnu fáa gleði av. Tey hava láninet til foreldur, øll børnini hava hvør sína kovboytasku, sum er seymað úr gomlum buksum - og eisini hava tey fjøruposar, sum tey taka við sær, tá tey fara oman á sandin.

Leiðarin á dagstovninum, Jóna Guttesen, leggur dent á at menna eina umhvørvisvinarliga mentan, sum børnini kunnu bera víðari.