Kvotan á Flemish Kap nærum tvífaldað

Føroysk skip sleppa at fiska góð 2.600 tons av toski á Flemish Kap næsta ár. 

Tað er næstan tvífalt so nógv sum í ár. Í ár er kvotan 1.363 tons.

Stóra økingin í toskakvotuni kemst av, at limalondini í NAFO eru samd um at loyva eini munandi størri heildarveiðu eftir toski á Flemish Kap.

Mest loyvda veiðan fer úr 6000 tonsum í ár upp í 11.700 tons næsta ár.

Eiga góð 22 prosent av heildarkvotuni

Føroyar eiga 22,35 prosent av heildarkvotuni, og tí økist føroyska kvotan á Flemish Kap eisini munandi, ítøkiliga góð 92 prosent.

Á ársfundinum hjá NAFO, sum umsitir fiskastovnarnar á Flemish Kap, staðfestu limalondini, at útlitini fyri toskastovnin eru góð, næstu tvey árini. Og tí ber til at fiska meira burturúr stovnunum. 

Umframt 2617 tons av toski kunnu føroysk skip eisini fiska 193 tons av svartkalva og 69 tons av kongafiski á Flemish Kap næsta ár.

Rækjustovnarnir á Flemish Kap og Grand Bank eru framvegis illa fyri, og tí verður heldur ikki loyvt at fiska rækju har næsta ár.